Out and About

Liewe Sussie,

Die tyd stap aan, soos hy gewoond is om te doen. Ons stap 'n entjie saam, dan val ons uit. Hier is ons nou by Saterdag en ek is darem nog in die gevolg, al hink en pink ek 'n bietjie.

D is vort na sy klub. Die klub verskaf tee en rolle vir die spelers op Saterdae. Hy het (beeg mistake!) aangebied om Saterdae die broodrolle by die bakkery te haal en klub toe te neem. Hy moet flink uit die vere om agtuur daar te wees via die bakkery; daar is ook ander mense wat kom help on die goed oop te sny en die botter en ham en kaas daarop te sit. Dan kom hy huis toe en vertrek weer twaalfuur want die spelery begin eenuur.

As hy nou nie so dom was om homself uit te gee vir broodsmous nie, dan kon hy heel oggend heerlik hier by die huis rondgehang het met ontbyt en koerante en koffie. Tydsaam geskeer en gestort en aangetrek het om twaalfuur hier weg te ry.

Ek weet nie of hulle wel vandag sal speel nie, dit reen hard. Miskien klaar dit later op, wie weet. Indien nie, moet daardie broodrolle maar vrieskas toe vir vollende week.

Ek het 'n baie besiger week agter die rug as wat ek sou verkies het om te hê.

Die verjaardagvierings Saterdag by Lindsay se huis was baie aangenaam. Ek het 'n stel seep en "body butter" gekry by Heather, 'n almanak van Adelaide se kunsgalery by Pauline en 'n $30-boekwinkel-"voucher" by Lindsay en Margie.

Op die spyskaart was my paté en 'n seleksie antipasto vir voorgereg; die hoofgereg was hoender met heerlike slaaie, en die nagereg was melktert en 'n vrugtebord. Daarna was daar 'n verskeidenheid kaas en beskuitjies.  Elkeen het iets bygedra.

Sondag het ek en Karlien "Fair Game" gaan sien, met Sean Penn en ons eie Naomi Watts. (Nie saam met hulle nie - hulle was die hoofspelers!) Ons het baie daarvan gehou.

Dis my plan om more op die Heilige Sabbat "The King's Speech" te gaan sien, met Colin Firth, Helena Bonham-Carter en ons eie Geoffrey Rush. Dit gaan oor die Australiese spraakterapeut (natuurlik G Rush) wat vir George VI gehelp het om sy hakkel-probleem te bowe te kom toe hy koning moes word omdat sy broer hom so sleg gedra het met Miesies Simpson.

Ek dink dit gaan maer jare wees hier na vorentoe, want as die skoolvakansie eers inskop, dan is daar niks in die baaiskoupe nie behalwe kiddieflicks. Cartoons vir die kleintjies, vampiere vir die tieners en "car chases and explosions" vir die (manlike!) vertraagde adolessente van alle ouderdomme. Vir die vroulike vertraagdes is daar die rom/coms. Ek sal maar Brighton Bay toe moet ry na die art house cinemas, of na DVDs kyk in die gerief van my eie loungeroom. Ek het my movies nodig soos D sy bowls.

Hier by ons sit 'n mens nie op die couch of die sofa in jou lounge nie, jy sit op die lounge in jou loungeroom. Ander lande, ander tale.

Ek is gelukkig nou klaar met al my krismiskoeke. Die laaste een staan hier in die kombuis dat D hom kan eet. May wou ook vir hom nog 'n koek gee (hy het reeds een gekry by haar) maar ek het gesê nee. Die bure het vir ons sjokolade gegee wat hy eiehandig (of eiemondig) opgesmul het en ek het by Joan ook sjokolade gekry vir my verjaarsdag, maar dié het ek verberg en gister vir Michael die Voetvent gegee. Re-gifting is the name of the game.

Maandag het ek vir Marlene ontmoet vir koffie en moes twee uur lank luister hoe sy kla. Sy het gekla oor haar dogter, haar broer, haar bure en haar tuinier. Sy woon in 'n meenthuis-kompleks van vyf huise en sy sê niemand daar praat met haar nie, sy het 'n vete met elkeen. Dis natuurlik al die ander mense se skuld. Dis my beleid om net te luister en nooit self iets te sê nie, behalwe "Dear me!" en "How dreadful!" en "Of course you did!" - op die manier gaan ek nooit 'n vete met Marlene hê nie!

Dinsdag was ek by Andrew die Tandarts. Ek het vir hom en sy dames 'n vrugtekoek geneem soos ek elke jaar doen. Andrew het nou drie kinders - Grace het verlede week die lig gesien. Alice en Harry is 6 en 3 onderkeidelik. Dit lyk of Miesies Tandarts elke drie jaar 'n pienkvoet in die veld stoot - ek weet nie hoeveel daar nog hulle opwagting gaan maak hier na vorentoe nie. Andrew kan bekostig om nog 'n hele paar kinders te onderhou en na duur privaatskole te stuur waar hulle ma hulle gaan aflaai in haar Porsche: daar was niks met my tande verkeerd nie en ek het $225 uit my beursie moes ruk toe ek kant en klaar my mond uitgespoel het met daardie pienk goed wat soos bubblegum proe.

Andrew het my tande beloer met 'n spieeltjie en hier en daar aan hulle gekrap met daardie hekelpen wat hulle gebruik. Daarna het hy my gebit bygekom met 'n elektriese borsel en hulle sodanig opgepoets dat jy jou oë moet toeknyp as ek glimlag. Ek moet sê hy het ook x-strale geneem soos hy elke 2 jaar doen, dis seker hulle wat so duur was.

Woensdag het my skoonmakers Jenny en Roy hulle laaste diensplig vir die jaar gedoen. My huis moet nou maar geleidelik vuiler word tot hulle weer in die middel van Januarie hulle opwagting maak. Ek sal darem nou en dan 'n stoflap rondswaai voor ons kniediep in die stof en krummels is. Maar ek verseg om agter 'n stofsuier aan te stap. Ek sal nou en dan halfhartig 'n besem oor die kombuisvloer stoot, dis al. Elke man moet self 'n lap oor die teels in sy stort trek, Toilet Duck in sy spoelie spritz en die seep-spatsels van sy wasbak se krane afvryf met 'n stukkie (ongebruikte!) toiletpapier. Karlien en D se badkamers is nie my besigheid nie!

Donderdag het ek saam met Joan gaan eet by die Japanese restaurant soos ons verlede week sou doen maar rain stopped play en ons het dit uitgestel na vandeesweek. Ons het miso sop gehad: dit en 'n bakkie vrugteslaai kom gratis met die maaltyd. Joan het 'n seleksie tempura groente bestel en ek het teriyaki hoender gehad. Dis was baie aangenaam en ons het lekker gesels.

Joan het haar beursie uitgeruk en vir alles betaal want dit was vir my happy birthday. Sy het ook vir my 'n seleksie Ahmad tee gegee en die sjokolade waarvan ek reeds melding gemaak het. Die tee sal ek beslis nie re-gift nie!

Vrydag was ek en Carla vir ons 8-weeklikse besoek by Michael die Voetvent om ons tone te laat optert. Pedicure and foot massage! Daarna het ons by die RSL gaan eet soos gewoonlik. Ek het 'n Tandoori hoenderslaai gehad, met mango, avocado, tamatie en rooi uie. Carla het die roast of the day bestel en dit was kalkoen met 'n seleksie oondgebakte groentes. Agterna het ons vrugteslaai geëet. Die ander nagereg was wortelkoek met room, maar ons was nie daarvoor lus nie.

En dit bring ons weereens by vandag, Saterdag. Ek het niks op my program nie en dis my plan om net hier by die huis rond te luier: na my ballet-DVDs te kyk, tee te drink, my boek te lees en nou en dan wasgoed op te hang. Ek het verskeie bondels wasgoed om vir Gladys te gee en sy is mos nie bereid om self die goed op te hang nie.

Volgende week is my program ook nie te vol nie, waaroor ek baie bly is.

Nouja, Sussie, hou lekker vakansie by die C en ek hoop om alles van jou avonture in Jeffreysbaai te hoor wanneer jy weer terug is by jou huis.

Ek stuur vir jou 'n sy-serpie vir Krismis. My vriendin Alison verf hulle.

Menige groetnisse,

Karlien